156. De sancto Augustino.

1 a. Ave, verbi dux et cleri,
Forma vitae, doctor veri,
Augustine pontifex;

1b. Ave, praeco trinitatis,
Et illius civitatis,
Cuius hic es opifex.

2 a. Ave legis
Arca, gregis

Manna, planta gratiae,

2 b. Cuius fructus
Tollit ductus

Tumoris superbiae.

3 a. Ave, cuius studia
Contra cuncta vitia
Procurant remedium.

3 b. Ave, carens simili
In doctrina stabili
Habens privilegium.

4 a. Ave, stella matutina,

Per quam fulsit lux divina
Humano ingenio.

4b. Ave, pater clericorum,

Morum schola, flos doctorum,
Subtilis eloquio.

5 a. Ave, gemma

Fulgens caeli iubare;

5 b. Ave, lingua

Plena dulci nectare.

6 a. O quam mirabile
Et quam laudabile
Dei consilium,

6 b. Per quod uberrimis

Est matris lacrimis

Datum solacium !

7 a. O quam dulcis, quam devota,
Cuius sunt audita vota
In caelesti curia,

7 b. Per quam flore prophetiae
Verae iunctus est sophiae
In adulescentia!

8 a. O amoris philomena,
Sol refulgens, luna plena,
Tus ardens et os aureum,

8 b. Ne nos relinquas orphanos,
Pie pater, visita nos,
Emolliens cor ferreum.

9. Tui sumus, tibi dati,
Voto tibi commendati,
Nos commenda trinitati
Ne spe simus defraudati.