160. De sancta Barbara.

1 a. Eia, recolamus pie

Vitam inclitae Barbarae,
Divinae nos ut gratiae
Conciliet sua prece.

1b. Haec civis Nicomediae,
Nata regali semine,
Suae filias patriae
Transcendit pulchritudine.

2 a. Divina providentia

Nomen eius est Barbara,
Quod dicitur aliena
Sive tritici filia.

2b. Renuntiavit ritui
Patris sui Dioscori,
Facta filia tritici
Hoc est Christi crucifixi.

3 a. Scientia doctissima
Necnon mentis sagacia
Deprehendit vanissima
Fore gentium idola,

3 b. Instinctu sancti spiritus
Non humanis dogmatibus,
Ex creaturis omnibus
Probavit, quod unus Deus.

4 a. De Deo quidquid Barbara
Per se scire non valuit,
De hoc in Alexandria
Origenem consuluit;

4 b. Per hunc ipsa instruitur,
Et in fide catholica
Fundatur et proficitur
In divina noticia.

6 a. Ecce pulchrum miraculum !
Barbara suis precibus
Siccum balneandi locum
Aquis replet salubribus;

6 b. His a baptista Domini
Baptizatur feliciter,
His sanantur omnes aegri,
Tangentes has fideliter.

7 a. Dioscorus ut filiam
Fidelem fore percipit,
Hanc gladio mox impetit
Furoris per insaniam.

7 b. Virgo patris ex oculis
Extra urbem transvebitur,
Reperta caeditur nimis
Taetraque cella clauditur.

8 a. Barbara ad praetorium
Tracta sic orat Dominum:
"Veni mecum, o Domine,
Tuis armis me protege;

8 b. Veni ut queam vincere
Patrem meum cum praeside,
Fac me virum de femina,
Ut loquar cum constantia."

9 a. Marciano dum sistitur,
Hunc prior sic alloquitur:
"Quid me tibi vis sistere,
Visne fidem meam scire?

9 b. Christianam me noveris,
Fidemque Christi nominis
Non negabo poenis ullis
Quantisque me punieris".

10 a. Hinc nuda virgis caeditur,
Tauri nervis discerpitur,
Ciliciis atteritur
Inde sale conspargitur ;

10 b. Testis fractis inicitur,
Taetro carcere clauditur,
Cum luce Christus cernitur
Laesaque sana redditur.

11a. Tandem occumbit gladio
Pro Christi testimonio,
Excellenti victoria
Migrans ad caeli gaudia.

11b. Quis non miretur nimium
En tam virilem animum,
Sub anno quintodecimo
In sexuque femineo?

12 a. O Barbara sanctissima,
O illuminatissima,
Tuere tuos famulos
Repellens omnes aemulos,

12 b. Ut per tua precamina
Nostra laxentur crimina,
Et in terra viventium
Laetemur post exsilium.