162. De sancta Barbara.

1 a. O virgo, martyr Barbara,
Sponsa tui sponsi cara,
Grata quoque eius ara,

1b. Inter flores rosa clara,
Pulsa felle hic amara,
Nobis caeli viam para.

2 a. Vincens hostem manu plaude,
Super astra vernans gaude,
Opem ferre tuis aude;

2 b. Expers tabe, plena laude,
Daemonis nos solvens fraude,
Seras portas silex claude.

3 a. Linquens vanaque servisti
In bac valle velle Christi
Prorsus absque mente tristi,

3 b. Verum Deum fore scisti
Quem prae cunctis dilexisti,
Nos fer illuc, quo scandisti.

4 a. Nuda parentis odio,
Idola cessans studio,
Iuncta solari radio,

4 b. Firmata Dei filio,

Cui conregnans gaudio
Poli nos loca solio.

5 a. Passa carnis laceratu
Capitisque malleatu
Cum plurimo tormentatu,

5 b. Evadens cum potentatu
Flexos tibi famulatu
Posce frui coronatu.