163. De sancto Bartholomaeo.

1 a. Suspendentis aquas fili,
Pastor, gregem ab hostili
Fauce serva in ovili
Agni sine macula.

1b. Expolita norma morum
Planet motus internorum,
Ne distorta vitiorum
Surgant offendicula.

2 a. Vice Christi pascis gregem,
Lege munis, ut per legem
In decore cernat regem
Regnantem in solio.

2 b. Tuae sorti cedunt gentes,
Tu virorum mutas mentes
Per errorem dissidentes
Conformat religio.

3 a. Gaudent Indi fide nacta,
Nec humana manu facta
Solo lapsa et confracta
Dispernantur numina.

3b. Fit in saxis caelatura
Index crucis sub figura,
Ne formidet plebs secura
Daemonum molimina.

4 a. Fructu labor commendatur,
Qui cum fructu geminatur,
Fide Christo subarrhatur
Credens Lycaonia.

4b. Mentis mundae surgit testis
Non infecta sorde vestis,
Comes tibi sit caelestis
In terris militia.

5 a. Rex Astriges, rex Indorum,
Cultor fervens idolorum,
Nova tibi tormentorum
Congerit discrimina;

5 b. Unde prius fustigatus,
Cute tota post nudatus,
Ense tandem laureatus
Consummans certamina.