166. De sancto Benedicto.

1 a. Gloriosum patrem nostrum
Collaudemus Benedictum
In caelesti gloria,

1b. Deo grates referentes
Corde, voce et narrantes
Ipsius praeconia.

2 a. Nam cum esset puer studens,
Vanas scholas fugit pudens,
Sprevitque terrestria,

2 b. Et cor voto sancto fervens
Solum Deum summum quaerens
Fixit in caelestia.

3 a. In aetate iuvenili

Sensu vivens cum senili
Cuncta vicit vitia,

3 b. Et ut stella matutina
Vita lucens et doctrina
Plenus fulsit gratia.

4 a. Imitator Helisaei,

Vir propheta par est ei
Spiritu sanctissimo.

4 b. Giezi namque is absentem
Munus vidit cupientem
A Naman gratissimo,

5a. Sed hic foris comedentes
Vasque mappas abscondentes
Pari spexit oculo.

5 b. Fundo mersum ferrum aquae
Sursum vexit mox uterque
Parili miraculo.

6a. Ossa, carnem fractus muro
Fit ruente poste duro
Huius sanus precibus ;

6 b. Alter vivus morte surgit,
Almi tactu lepra fugit,
Quamquam tumens faecibus.

7 a. Caritateque placebat,

Sicut David, cum deflebat
Mortuum malivolum.

7 b. Hic virtute qua pollebat
Ex oppressis expellebat
Omnibus diabolum.

8 a. Tuos servans hostis ira,
Benedicte, nova mira
Quac nunc cupit nostra lyra
Dulci cantu promere.

8b. Ora demum, ut tuorum
Coronator meritorum
Tecum donis beatorum
Nos dignetur comere.