170. De sancto Bernardo.

1 a. Clarae vallis lilium
Clarum in triclinium
Sumpsit Deus hodie.

1b. Servum suum exuit
Bernardum et induit
Trinae stola gloriae.

2 a. Triste matris somnium
Virtutum fit omnium
Nobile sacrarium:

2 b. Somno latrans cernitur,
Interpres requiritur
Tale dans augurium:

3 a. Catulus est mysticus
Natus nardus pisticus,
Bernardus ingenuus,

3 b. Angelorum socius,
Prophetarum conscius,
Christi miles strenuus.

4 a. Cui pater filii
Horam natalitii
Revelavit puero,

4b. Solem sapientiae
Ostendens in specie.
Qua processit utero.

5 a. Ex quo coepit crescere
Puer et clarescere
Sanctorum ingenio.

5 b. Sacras dictat cartulas,
Altas stupent notulas
Papa cum concilio.

6 a. Divos bibit apices,
Rivi fluunt codices
Ore sanctuarii ;

6 b. Germinat ecclesia,

Rutilant coenobia

Luce luminarii.

7 a. Omnia in omnibus
Factus est virtutibus,
Signis et miraculis;

7 b. Falsa fugat omnia,
Caecis reddit lumina,
Claudos solvit baculis.

8 a. O splendor iustitiae,
Oleum laetitiae,
Monachorum gloria,

8 b. Vitae tuae speculo
Trahe nos de saeculo,
Pater, ad caelestia.