174. De sancta Brigida.

1 a. Campi flos et lilium,
Alta linguens collium,
Petit ima vallium,
Collecturus lilia.

1b. Una inter varia
Rosa pigmentaria
Invenitur, balsama
Superans fragrantia.

2 a. Haec est rosa, quam collegit
Rex caelorum et elegit,
Quam libido non confregit,
Sacra virgo Brigida.

2 b. Castitate singularis
Aetas floret puellaris,
Morum normam,stellammaris,
Vita sequens rigida.

3 a. Cuius caro illibata
Est virtute exornata
Et caelesti gratia,

3 b. Quae cervicem venenosam
Anguis trivit et exosam
Habet in munditia.

i a. Virgo casta et perita,
Secum ferre non oblita
Oleum in vasculo,

4b. Et ad thronum introducta
Summi regis, non seducta,
Sponsi digna osculo.

5 a. Castitatis praefert palmam,
Terris vitam ducens almam,
Dei plena gratia.

5 b. In hac valle faecis sita,
Caelo, terris inaudita
Fecit mirabilia.

6. Caeco visum, claudo gressum
Reddens, atque vi oppressum
Salvans de miseria.

7 a. Pulsa lepra iam leprosa
Munda carne fit formosa
Eius beneficio.

7 b. Surdus audit, Christo credit
Infidelis, sanus redit
Pulso mentis vitio.

8 a. Mutat virgo rerum formam,

Supra usum atque normam

Novas praestans species.

8 b. Alteratur ac natura,

Quam non prima genitura
Dedit neque series.

9 a. Plura manu salutari

Fecit, quam nos quimus fari
Virgo sancta Brigida.

9 b. In qua suum struxit templum
Ipsam nobis dans exemplum
Ille verus Idida.

10 a. Talis exstans, o benigna,
Summi regis sponsa digna,
Assis tuis famulis,

10 b. Qui te laudant venerantes,
Tua festa celebrantes
Admiranda saeculis.

11a. Nos, qui sumus in hac faece,
Reducamur tua prece
Ad supernam patriam,

11b. Ubi Christus, verbum patris,
Suae castae prece matris
Nobis donet gloriam.