178. De sancto Cedda.

1 a. Mundae mentis puritate,
Mundae vocis veritate,
Mundae manus largitate
Praesul Cedda floruit,

1b. Hic ab Anglis procreatus,
In occasu solis natus,
Vero sole venustatus,
Sol alter emicuit.

2 a. Quasi stella matutina
Caecitatis a ruina
Vita, signisque doctrina
Mentes traxit hominum.

2 b. Mundi fastum devitando
Pedes ivit praedicando,
Praedicantem imitando
Maiestatis Dominum.

3 a. Quod optavit et quaesivit,
Diem mortis hic praescivit,
Quem de morte praemunivit
Angelorum contio.

3 b. Quibus sanctus sociatus
Sui munere precatus
Nostros diluat reatus
Et nos iungat gaudio.