180. De sancto Christophoro.

1 a. Christi calix quam praeclarus,
Gustu licet sit amarus,
Vitae fert dulcedinem ;

1b. Calix vero Babylonis,
Venenosis blandus bonis,
Totum necat hominem.

2 a. Conregnare Christo quaerens
Christoforus, Christum ferens,
Christum amans unice,

2 b. Dum pro Christo celeratur
Cruciari, debriatur
Claro Christi calice.

3 a. Hic est unus ex trecentis
Electis ad proelium
Sub figura praeferentis
Iam crucis mysterium.

3 b. Hic incedens praecedentis
Gedeonis tramite
Fontis aquam salientis
Haurit recto poplite.

4 a. Hic in bello resonantem
Tubam gestat dextera,
Lampademque coruscantem
Manu portans altera;

4b. Dum lagenam. carnis audet
Frangendam exponere,
Ea fracta victum gaudet
Hostem sibi cedere.

5 a. Quem signorum magnitudo,
Quem commendat sanctitudo,
Quem orantem multitudo
Plebis spectat sedula;

5 b. Quaeperpendens virgae signum
Et admirans virens lignum
Baptizatur, fructum dignum
Proferens cum virgula.

6 a. Dum a fide nequit flecti
Status testis praeelecti,
Carcerali primo plecti
Iubetur custodia.

6 b. Per [hunc] illic, Aquilina
Niceaque sub divina
Certant ope feminina
Calcare contagia.

7 a. Ad certamen educuntur
Et non cedunt, dum caeduntur,
Sed pro poenis consequuntur
[Caelum] momentaneis.

7b. Sic inferens morti damnum,
Sic offendens regem Dagnum,
Sanctus scandit candens scamnum,
Virgis caesus ferreis.

8 a. Non olivum, non sagittae
Frangunt illum nec ignitae
Cassidis supplicium;

8 b. Tandem ictu pugionis
Pretiosae passionis

Est adeptus praemium.

9 a. Summe miles summi regis,
Tui pius vota gregis
Attendens humilia,

9 b. Nos de fumo Babylonis
Ad snpernae visionis
Transfer luminaria,

10. Quo referti plenis bonis
Concinamus: Alleluia.