183. De sancto Clemente.

1 a. Gloriosae mentis virum

Signis et virtute mirum

Extollant praeconia;

1b. Laudet nostra vos Clementem,
Cuius gloriosam mentem
Recolit ecclesia.

2 a. Hic pastoris sumpta cura
Multis fecit profutura
vitae suae tempora;

2 b. Per hunc error profugatur,
Hoc proclamat, hoc testatur
Conversa Theodora.

3 a. Surdum, caecum existentem
Prece sanat, et credentem
Baptizat Sisinnium ;

i3b. Per quem viri quadraginti
Christo credunt, et Clementi
Dantur in solacium.

4 a. Hinc vir sanctus relegatur,
Sed per ipsum consolatur
Exsulantum concio ;

4b. Nam dum aquam relegati
Deportassent fatigati
Sexto miliario,

5 a. Monet plebem circumstantem,
Ut oret, et agnum stantem
Videt, cuius indice

5b. Pedis fons vivus monstratur;
Orat sanctus, aqua datur
Percusso iam silice.

6 a. Hinc ab idolis recedit,

Et per gyrum Christum credit
Omnis fere populus.

6b. Hic in mare dum iactatur
Sacer ei praeparatur
Ab angelis tumulus.

7 a. Ibi Christus operatur,
Per quae fides dilatatur,
Immensa miracula;

7 b. Cuius prece Deo grata,
Nobis vitae praeparata
Dentur habitacula.