185. De sancto Cypriano.

1 a. Adest dies celebranda
summa cum laetitia,

1b. In qua fertur in hac aula
Cyprianus athleta.

2 a. Cedat maeror, cedat luctus,
exsulet tristitia;

2 b. Diapason, diapente
resonet harmonia,

3 a. Et concordent plectra chordis,
cymbalo psalteria;

3 b. Cypriano claras laudes
iubilet ecclesia.

4 a. Martyr beate,

universa quem decorant
virtutum insignia,

4 b. Doctor insignis,

iustus, fortis et modestus,
prudens super omnia.

5 a. Fragrant rosae martyrii,
spirant vitae lilia,
Praefulgent flores diversi,
gloriosa studia.

5 b. Fidei purpura micat,
caritatis rutilat
Coccus, byssus puritatis,
iacynthi fiducia.

6 a. Hic basis, qua Salomonem
ferunt insculpsisse
Cherubin et leonem,
bovis forma praenotata.

6 b. Si cherubin sapientem,
leo constantiam
significat, ferentem
bovis forma imitata.

7 a. Armum separationis,
Pectus elevationis
Percipis ex hostia;

7 b. Linguam quoque cum maxillis,
Utebatur praesul illis
In significantia.

8 a. Pectus notat intellectum,
Armus opus praeelectum,
Lingua fandi munia.

8 b. Istis partibus donatur
Cyprianus, coronatur
Honore et gloria.

9 a. Hic sacerdos Dei magnus.
Qui in iracundia

9 b. Tibi, Christe, Dei agnus,
Placet et fit gratia.

10 a. Totus odor vitae fragrat,
Tantus amor Dei flagrat
Cordis in arteria,

10 b. Ut pro fide patienter
Cuncta ferat, et libenter
Patitur exsilia.

11a. Pie martyr Cypriane,

Qui pro Christi nomine
Fis hostia,

11b. Fac nos tecum, supplicamus,
In aeternum canere:
Alleluia.