196. De s. Edwardo Confessore.

1 a. Laetetur ecclesia
Recolens magnalia
Sancti regis Edwardi.

1b. Prae cunctis haec curia
Eius in memoria

Psallat melo concordi.

2 a. Ecce praesens nos invitat,
Qui nos regit, qui nos ditat
Tot bonorum copia,

2 b. Cuius vita nobis formam
Et vivendi monstrat normam
Virtutum per opera.

3 a. De regali stirpe satus,
Deo gratus, ei datus
Est ab annis teneris ;

3 b. Regno pollens, regum heres.
Ad hoc vivit, ut coheres
Christi sit in superis.

4 a. Sponsam ducit nec deflorat,
Christum videt et adorat
In figura hominis:

4 b. Dormientes septem viri
Latus mutant, signum diri
Rex prophetat ominis.

5 a. Hic Dacorum regem mersum
Et ad sua mox reversum
Prospicit exercitum,

5 b. Excusare dum se quaerit,
Comes Offae gustu perit
Sceleris ob meritum.

6a. Nullum vides, nullum legis,
Qui sit in persona regis
Ut Edwardus humilis,

6 b. Qui contractum non abiecit.
Sed portando sanum fecit
Pauperem rex nobilis.

7 a. Mirum est de baculo,
Mirum et de annulo
Regi reportata ;

7 b. Mira sunt et alia,
Quae narrat historia
De rege beato.

8 a. Lege lata,
Pace data,

Tergens rex in senium,

8 b. Virgo mansit,
Sicque transit
Ad caeli palatium.

9 a. Ergo, noster advocate,
Rex in astris coronate,
Audi preces supplicum;

9 b. Ad te clamat haec caterva,
Tu nos rege, tu hoc serva
Tuum habitaculum.