200. De sancto Elisaeo.

1 a. Festivemus sollemniter,
Cantemus unanimiter
Cordis cum tripudio,

1 b. In hoc festo Elisaei ;
Fidus servus veri Dei,
Astans ei iugiter,

2 a. Rem difficilem rogavit,
Quam a Deo impetravit,
Ut de eo legitur,

2 b. Quamvis hoc sit difficile
Nos esse sine crimine,
Elisaeus instabit.

3 a. Lepra Naaman mundatur
In Iordane et purgatur
Suo adiuvamine.

3 b. Omnes fratres de Carmelo
Pie petunt bono zelo
A crimine purgari.

4 a. Et Sunamitis filio
Per ipsum resuscitato
Redit matris gaudium.

4 b. Si vexamur trina morte,
Tunc per ipsum aequa sorte
Protegamur iugiter.

5 a. O quam fame Samariae
Eiusdemque penuriae
Repent[in] subvenit.

5 b. Subvenire nos dignetur;
Pius est, dum invocetur
Suo patrocinio.

6 a. O rex creator omnium,
Qui per Eliae pallium
Iordanem desiccasti,

6 b. Ariditatem tribue,

Malos consensus remove
A tuis supplicibus.

7 a. Puerique illudentes

[Et] prophetam infestantes
Ab ursis sunt necati.

7 b. Ne ab infernali ursu
Tribulemur in hoc cursu,
Defende nos suaviter.

8 a. O Elisaee inclite,

Ad te clamant Carmelitae,
Sis eis propitius,

8 b. Pallium tuum candidum
Sit eis propugnaculum
Contra mala cosmica.