209. De ss. Felicitate et septeni Fratribus.

1 a. Felix mater filiorum
Septem vere beatorum,
Honore digna laude,

1b. Quos in Christo genuisti
Et in fide docuisti,
O pia parens, gaude.

2 a. Hi per tua hortamenta
Diversa passi tormenta,
Facti Christi martyres,

2 b. Caesaris per imperium,

Pertulerunt martyrium,

Summi regis milites.

3 a. Quorum tres sunt decollati,
Duo fustibus necati,
Fortes in certamine,

3 b. Et quartus praecipitio
Peremptus, hoc supplicio
Constans Christi nomine.

4 a. Sed primus plumbatis caesus
Fide permanens illaesus
Taliter occubuit.

4 b. Sic pro Christo consummati

In aeternum nunc beati,

Totum Deus voluit.

5 a. Alexander, Martialis.
Philippus, Felix, Vitalis,
Silanus, Ianuarius;

5 b. Haec sunt nomina eorum
Libro vitae beatorum
Inscripta divinitus.

6 a. Tu mater passa septies
In filiis, deinde es
Pro Christo decollata,

6 b. Circumquaque vera fide
Et firmiter secura spe,
Caritate armata.

7 a. O beata Felicitas,
Te laudat universitas
Totius ecclesiae.

7 b. Atque tuam progeniem
Christo Deo amabilem
Sempiterno tempore.

8 a. O felix generatio,
Tua poscat oratio
Pro nobis salvatorem,

8 b. Ut, exuti terrestribus,
Coniungamur caelestibus
Divinum per amorem.