218. De sancto Gendulpho.

1. Ecce, magno sacerdoti
Mundi cordis et devoti
Immolemus hostiam,

2 a. Die sacro revoluto
Quo de viae volat luto
Viator in patriam.

2 b. Servus prudens in talentis,
Miles fortis in tormentis,
Bino gaudet praemio.

3 a. Servi patris patrem laudent
Qui patroni tanti gaudent

Laeti patrocinio.
Felix pater Gendulfi genitus
In Adia fecunda caelitus

Semen vitae seminat.

3 b. Marcent clausae matris artus,
Quam recludens florens partus

Florem sacrum germinat.
Florem fons baptismatis,
Ros rigat carismatis

Sub Sixto pontifice.

4 a. Sub caelesti disciplina
Dote morum et doctrina
Dotatur mirifice.

4 b. Aetas stupet morum pignus,
Sacrae sedi servit dignus
Sacrae sedis apice.

5 a. In pastorem sublimatur,
Delegatur, operatur
Salutem in gentibus,

5 b. Christo simul operante
Et sermonem confirmante
Signis consequentibus.

6 a. Arma paenitentium,
Saccum et cilicium
Flagra gerit corporis.

6 b. Pane hordeaceo
Potu vivit amneo
Sub deserto pectoris.

7 a. Geminatur

Spes coronae,
Verus martyr
In agone

Perstat ad martyrium.

7 b. Iudex saevit
Ut infligat,
Fornax frigit,
Christus rigat

Spondenspugnaebravium.

8 a. Iudex plorat,
Pastor orat,
Et torquentis
In tormentis

Vitae reddit filium.

8 b. Iudex credit,
Pastor cedit,
Cellam ponit
Et disponit

Fratrum domicilium.

9 a. Dum disponit officinam,
Hostis armat spem vulpinam,
Fratrum saevit in gallinam
Animal perfidiae.

9 b. Pater vulpi comminatur,
Et gallina reportatur,
Vulpes luit, morti datur
Ad fores ecclesiae.

10 a. Sic a vulpe spiritali
More vagos bestiali
Suos solvit, et poenali
Carnis a contagio.

10 b. Figuratur in gallina
Vaga caro iumentina
Quam seduxit fraus vulpina
Dum vacillat ratio.

11a. Ergo tui custos horti.

Qui gallinam datam morti
Vitae reddis manu forti,
Sic nos rege, quod in grege
Nil possit vulpecula.

11 b. Esto praesens, o patrone,
Desolatis in agone,
Esto nobis intercessor,
Vere martyr et confessor.
Per aecerna saecula.