221. De sancto Gilberto.

1 a. Nisu cordis exsultemus,
Omnes simul concrepemus
Concordi laetitia,

1b. Confessoris Gilleberti
Iure iam caelis inserti
Cantemus magnalia.

2 a. Absint procul livor, ira,
Nostra decachorda lira
Careat discordia.

2 b. Eius virtus, mores, vita
Nos instituentes ita
Invitant ad talia.

3 a. Nam eius religio
Non latet sub modio,
Immo solis radio

Plura praebet lumina.

3 b. Coaevis pro bravio
Cunctis in hoc invio
Percucurrit stadio
Serens sancta semina.

4 a. Vas honorum
Plenum honestatis,

Honor morum,
Praeco caritatis,
Vitae disciplina,
Vitiis ruina,

4 b. Tus odorum,
Forma bonitatis,
Dives morum
Custos castitatis,
Procurat doctrina
Ne sit virgo Dina.

5 a. O quam ferax fuit iste,
Infinitos tibi Christe
Virgines cum viris
Iunxit modis miris
Iunctura remota.

5 b. In eadem domo degunt,
Edunt, bibunt, psallunt, legunt,
Cum infirmo sexu
Iuncti casto nexu
Viri sine nota.

6 a. Natae patri, nati matri
Vultum et colloquium
Et omne consortium
Negant eius iura.

6 b. Mammo trectus et abiectus
Et in messe lolium
Est, qui censet vitium,
Cum luget natura.

7 a. Dicam nec est secus,
Quoddam caeli decus
Fulget in hoc coetu
Et vita angelica.

7 b. Nec minus insigne
Servatur in igne
Stuppa sine metu
Sed virtute deica.

8 a. Separat, quos unit,
Impugnat, quos munit,
Promovet, quos punit,
Vir mira prudentia.

8 b. Tale decet eum
Regimen, qui reum
Pertrahit ad Deum
Mundi per haec invia.

9 a. Cum his turmis redit
De Mesopotamia,
Redeunti cedit
Esau malitia.
O quam dat utilia
Post eius vestigia
Grex balans suspiria !

9 b. Nullum luctus laedit

Aut gravat maestitia,

Qui formam, quam dedit,
Servat innocentia.

Nam post haec fallacia

Possidebit gaudia

Indeficientia.

10 a. Et tamen hunc odit
Heliam et rodit
Iezabel maligna
Virtutum privigna.

10 b. Sed Christus ostendit,
Quis sit, quem defendit
Per tot mira signa
Tanto viro digna.

11a. Ergo, decus Angliae,
Sancte Gilleberte,
Forma pudicitiae,
Fac possimus per te
Vitare pericula
Tuti tua regula,

11b. Tecum Deum cernere
Semper in decore,
Tecum quoque vivere
Carentes maerore
Absque naevi macula
Per aeterna saecula.