226. De s. Gulielmo Eboracensi.

1. Sospitate morbos lenit
Olei linitio,

2 a. Quod a tumba sancti venit,
Visus testimonio,

2 b. Vulgi lapsi nullum laedit
Vasti pontis fractio.

3 a. Unda stupens viam dedit
Solidam in invio.

3 b. Ab absorpto mors recedit
Putei diluvio.

4 a. Deprivatis visus redit,
Et miratur ratio:

4b. Rem tam novam, quodpraecedit
Habitum privatio.

5 a. Surdus psallit ex auditu
Mutus ex eloquio,

5b. Vita viget novo ritu
Mortis in hospitio.

6 a. Praeconizat virum Dei
Leprarum curatio,

6 b. Multi morbi surgunt ei
Laudis in praeconio.

7 a. Ergo pium patrem laudet
Chori iubilatio,

7 b. Cum quo caeli coetus gaudet
Aeterno convivio.