232. De sancto Hugone.

1 a. Regis aeterni regia

Sanctum Hugonem hodie

1b. Recepit cum laetitia

In largo sinu gloriae.

2 a. Nobili genere,

Sed moribus nobilior
Nihil degenerat.

2 b. Cum Christo vivere

Vult, ut sit generosior
Christum desiderat.

3 a. Mundum habens in odium,
Purus a pueritia,

3 b. Cluniaci coenobium

Intrat cum Dei gratia.

4 a. Leve Dei onus libens
Sustinuit,

Et regulariter

4b. Cunctis aeque bonus, cunctis
Complacuit
Universaliter.

5 a. Rector factus demum
Dicti coenobii

5 b. Cum Bariona remum
Sumpsit remigii.

6 a. Dum est abbas factus
Coepit ostendere

6 b. Spiritales actus

Verbo et opere.

7 a. Fulgens miraculis
Renovat omnia;

7 b. Patet prae oculis

Praesens ecclesia.

8 a. Ergo prece qua possumus,
Sancte Hugo
Pater egregie,

8 b. Nos tui servi quaesumus,
Esto tuae

Memor ecclesiae.

9 a. Et quia metum incutit
Et nos undique percutit
Persecutorum gladius,

9 b. Opem confer et operam,
Ne declinet ad vesperam
Religionis radius.

10 a. Iam felix felicem cursum
Fecisti, iam regnas sursum
In paradisi gloria.

10 b. Per te nobis tribuatur
Pax et aperiatur
Regis aeterni regia.