240. In Navititate s. Iohannis Bapt.

1 a. Sonet vox laetitiae
Vallibus miseriae;
Sis doloris hodie
Nostri sublevamen.

1b. Ave, proles misera
Precatur subsidia,
Iuva prece sedula,
Propulsato vitio.

2 a. Vatum gemma nobilis,
Arca novi foederis,
Ardens cella luminis
Trinitatis radio.

2 b. Flos decus mortalium,
Maior natis hominum,
Nobis fer auxilium
Praesenti exsilio.

3 a. O vates eximie,
Profluens dulcedine,
Te amantes refove
Cordis domicilio.

3 b. Prece dele debita
Et restaura perdita,
Quaeque fugans noxia
Cordis nostri ostio.

4 a. O iubar laetitiae,
Tua mira facie
Nos velis revisere
Dirae mortis termino.

4b. Mundi luminarium,
Nulli par mortalium,
Nobis fer solacium
Mortis in articulo.

5 a. Praeco regis gloriae,
Caeli pausans culmine,
Te laudantes erue
Poenali supplicio.

5 b. Tua vox, o lucifer,
In auribus dulciter
Christi sonet iugiter
Pro nostro collegio.

6. Cum laetitia

Amen dicant omnia.