241. In Decollatione s. Iohannis Bapt.

1 a. Deo laudes gloriose
concinat praesens
celebritas,

1b. Cum beati praecursoris
commemoratur
festivitas;

2 a. Qui sterili conceptus,
angelico
est promissus
nuntio.

2b. Necdum sensit natus
virgineo

Christum clausum
utero.

3 a. Hic exortus,
linguam patris
resolvit
Et doctrina
prophetali
complevit,
Inde vicinis
provenit maxima
cum stupore
laetitia.

3b. Hic adultus
per deserta
deguit,
De cameli
pilis tegmen
habuit,

Artans lumbos
pellicia zona,
edens mella
silvestria.

4 a. Est Christo factus
praevius, Christum
sacris lavit manibus.

4b. Ipsum monstravit
omnibus, Christo
est praedictus angelus.

5 a. Reginae [horret] incestum
damnans turpe flagitium,

5 b. Probe increpans praeceptum
contra legis conubium.

6 a. Incarceratur,

cui cara est veritas,

6b. Insidiatur

cum filia Herodias.

7 a. O vere scelesta,
o vere saeva femina,
O saltatrix dira,
o funesta convivia,
Cruentata,
pertruncata
membra prophetalia.

7 b. O beatum caput

dignumque reverentia,

Quod in disco matri

tulit feralis bellua,

Quod tam multos

instruxerat

de Christi notitia.

8 a. Tu sancte noster patrone,
in aethere
iam laetaris
cum Christo perenniter,

8b. Pro veritatis amore
in honore
martyrii
praefulgens feliciter.

9 a. Hinc summa
pollens gloria

9 b. Sanctorum
inter millia,

10. Quibus nos pie socia.