242. In Decollatione s. Iohannis Bapt.

1 a. Profitentes veritatem
Impendamus dignitatem
Praeconi mirifico,

1b. Ab angelo nuntiatur
Pater, loquela privatur
Non credens veridico.

2 a. Alvo matris adhuc clausus
Matri Domini applausus
Iucundos exhibuit;

2b. Natus mundo gaudiosus
Patri muto gratulosus
Loquelam restituit.

3 a. Infans domi educatus

Ad desertum est translatus,
Sordes vitans scelerum,

3 b. Ubi ductus parcitate
Vestitus asperitate
Mundum sprevit prosperum.

4 a. Ob baptismum revocatus
Normam docet omnis status
Mores formans populi ;

4 b. Peccatores consolatur,
Pharisaeos aspernatur
Amatores saeculi.

5 a. O quam probat sibi carum
Sanctificator aquarum
Hunc baptismo proprio.

5 b. A Iordane dum conscendit
Hic salvatorem ostendit
Digiti indicio.

6 a. Hic veteris legis meta,

In nova plusquam propheta,
Christi testimonio.

6 b. Hic cherubin ex splendore
Et seraphin ex ardore,
Elias officio.

7 a. Dum arguit peccatorem
Eius condemnans errorem
Mancipatur carceri,

7 b. Caput datur saltatrici

Dum non parcit peccatrici
Nec consentit sceleri.

8 a. Hic castitate praepollens,
Veritate sordes tollens,
Insignis martyrio,

8 b. Compar factus angelorum,
Regnum vendicat caelorum
Trecenteno praemio.

9 a. Currant ergo servi Dei
Ad titulum tantae spei,
Ad tale confugium,

9 b. Ut nos sua sancta prece
Sine peccatorum faece
Perducat ad bravium.