243. De s. Iohanne Baptista.

1 a. Inter natos mulierum,

Ut testatur verbum verum,
Qualitates noscens rerum,
Non est quisquam genitus,

1b. Qui Baptistae praeferatur,
Ergo quivis accingatur,
Ut per laudem impendatur
Honor sibi debitus.

2 a. Nasciturus nuntiatur,
Caelitus sanctificatur,
Christum gestu praeconatur
Adhuc alvo positus;

2 b. Mater Dei famulatur,
Nato pater mutus fatur,
Virgo, doctor, martyr, datur
Plusquam vates habitus.

3 a. Et ut sermo perstringatur
Hoc pro summo teneatur,
Quod hic tantus habeatur,
Ut sit Christus creditus,

3 b. Qui transisti sic mortales,
Plusquam tales inter tales,
Nobis assis, quia vales
Nunc et hora transitus.