244. De s. Iohanne Baptista.

1a. O Iohannes, praeco Christi
Cunctis maior tu fuisti,
Teste Dei filio.

1b. Salvatorem baptizasti

Et praesentem demonstrasti
Tuo sancto digito.

2 a. In deserto praedicabas,
Peccatores animabas,
Spem promittens veniae,

2 b. Victus tuus et vestitus
Nunquam fuit exquisitas
Sed confectus macie.

3 a. Regem quoque et reginam
Increpabas ob rapinam
Incestus nefarii.

3 b. Propter quod es decollatus
Dum insanos dedit saltus
Filia diaboli.

4 a. O infelix filia,

Quam mala consilia,
Mater tibi dedit,

4 b. Cum baptistam Domini
Nulli parem homini
Decollari fecit!

5 a. In inferno estis ambae,

Et vos urunt dirae flammae
Cum Herode impio:

5 b. Sed Iohannes nunc laetatur,
Et in caelo gloriatur
Omni pleno gaudio.

6 a. Quod concedat nobis Christus,
Qui a patre nobis missus
Suo sancto sanguine

6 b. Nos redemit a peccatis,
Sempiternae claritatis
Repromissa requie.