247. De sancto Iohanne Ev.

1 a. Ad honorem summi Dei
Et Iohannis Zebedaei
Exsultemus gaudio.

1b. Caelum laudes moduletur,

Orbis totus iucundetur

Iucundo tripudio.

2 a. Patre natus Zebedaeo,
Ac germano Christo Deo,
Nepos matris virginis,

2b. Sponsam sponsus refutavit,
Sponsum mentis adamavit
Iesum patris gloriam.

3 a. Scripto trino trinitatem
Laudat, item unitatem
Patris, prolis, spiritus.

3 b. Virgo mundum illustrabat,
Missus est dum praedicabat
Patmos in exsilium.

4 a. Scribit in apocalipsi
Revelata mira ipsi,
Redit ab exsilio.

4 b. Tunc iacebat Drusiana
Morti data, surgit sana
Iohannis imperio.

5 a. Gemmas fractas solidavit,
Et defunctum suscitavit,
Convertit philosophum.

5 b. Hic venenum degustavit,
Vitae binos restauravit
Christus per theosophum.

6 a. Haereses exterminabat,
Fidem Christi confirmabat
Mirando prodigio,

6 b. Castitatem conservabat,
Caritatem praedicabat
Iam affectus senio.

7 a. Christus dicit seni mundo
Egressuro de hoc mundo:
"Veni ad convivia."

7 b. Laetabundus exsultavit,

Tumbam vivus cum intravit,
Non sensit exitium.

8 a. Lux caelestis radiavit,
Hic in caelis triumphavit,
Tumba manna scaturit.

8 b. Tua dona nobis ora,
Et corona nos honora
In caelesti curia.