248. De sancto Iohanne Ev.

1 a. Aquila mirabilis,
Beniamin amabilis,
O Iohannes,

1b. Vocatus a nuptiis
Illustras prodigiis
Fundis amnes.

2 a. Supra pectus Domini
Coniunctus es lumini,
Tu beatus,

2 b. Iuxta crucem virgini
Tu es vice domini
Natas datus.

3 a. Fulsisti prodigiis,

Caeli gaudens gaudiis
Es in vita,

3 b. Adiuvans suffragiis,
Beatorum praemiis
Tu nos dita.

4 a. Porta caeli clauditur,
Ante portam ponitur
Flos Latinam.

4 b. Fons in fervens oleum
Mergitur, vas aureum
Intra tinam.

5 a. Iohannes non uritur,
Virgo qui non patitur
Carnis aestum.

5 b. Pertulit opprobria,
Fecit mirabilia,
Hinc fit festum.

6 a. Virgo evangelicus,
Martyr apostolicus
Prophetavit,

6 b. Habet caeli gaudia,
Detur nobis gloria
Quam optavit.

7 a. Lucifer ecclesiae,
Luna castimoniae,
Stella claritatis,

7 b. Speculum munditiae,
Aurum sapientiae,
Gemma puritatis,

8. Iohannes, vas gratiae,
Columna constantiae,
Iunge nos salvatis.