257. De sancta Iuthwara.

1 a. Laetus fervor laetae mentis
Novitate pubescentis
Iucundetur in praesentis
Diei tripudio.

1b. Spes respiret a torpore
Ne torpescat in moerore,
Sed allaudat cum feivore
Iuthwarae praeconio.

2 a. Virgo felix, virgo mitis,
Sacra botrus sacrae vitis
Salutare praepeditis
Praestat beneficium;

2 b. Corde carne virgo pura,
Castitatis fovens iura
Novercali sub litura
Patitur supplicium.

3 a. Fraude lactis subornata
Stillat vestis delicata
Ut sic partu reprobata
Digna fiat stipite,

3 b. Adligans caput benigne
Poenas solvit, sed indigne,
Recens signum et insigne
Suo signans capite.

4 a. Ense fratris visitata
Manu portat rubricata
Caput, quod sic decollata
Membra membris haereant,

4 b. Ubi cervix virginalis
Capit ictus vim lethalis,
Fons emanat potu talis
Ut potantes gaudeant.

5 a. Miro ramorum decore
Robur crescens novo more
Fontem servans a fervore
Totum aestum vacuat,

5 b. Ensis cadit praesumptoris,
Perpetratra re furoris,
Mortem deplangens sororis
Morte totus aestuat.

6 a. Dignus digne maceratur,
Poena iusta flagellatur,
Sed ab illo tumulatur
Castitatis specula.

6 b. Virgo, sidus puellaris,
Medicina salutaris,
Salva reos ab amaris
Sub mortis nubecula.