259. De sancta Katharina.

1 a. Gaude prole, Graecia,
Laetetur ecclesia,

Psallat chorus virginum.

1b. Katharinae gratia
Dat mundo remedia
In salutem hominum.

2 a. Virtutum insignia
Praefert virgo regia,
Fragrans sicut lilium,

2 b. Pollens sapientia,
Fidei constantia

Confudit Maxentium.

3 a. Doctores gentilium
Doctrinae per radium
Victos Christo subiicit,

3 b. Quos purgat incendium,
Sed nec pilis vestium
Aut corporum officit.

4 a. Clausam sub custodia
Fovet alimonia
Propinata caelitus,

4b. Quam Christi praesentia
Cum caeli militia
Demulcet divinitus.

5 a. Blande dum alloquitur
Porphyrium iungitur
Coetibus fidelium;

5 b. Regina convertitur,
Mammis tortis mittitur
Ad palmam per gladium.

6 a. Quod orat assequitur
Virgo, collo plectitur,
Fluit lac cum sanguine.

6 b. Ab angelis tollitur
Corpus et reconditur
In Synai culmine.

7 a. Iuncta Dei filio

Sceptro gaudet regio,
Dans salutis oleum.

7 b. Cuius nos oratio
Ducat cum tripudio
Ad regnum sidereum.