263. De s. Katharina Senensi.

1 a. Gaude, mater ecclesia,
Agens laeta sollemnia
Katharinae virginis.

1b. Dominici proles pia
Peculiari gloria

Instet psalmis et hymnis.

2 a. Haec est sponsa Christi digna,
Passionis gerens signa
In proprio corpore.

2 b. Haec devicit hostem pugna,
Haec vitiorum ruina
Miro constat robore.

3 a. Dum mores damnat perditos,
Peccatores desperatos
Reducit ad veniam.

3 b. Doctiores reddit doctos,
Meliores et perfectos
Efficit per gratiam.

4 a. Cunctos resolvit dolores,
Mortem, pestem et languores
Humanae miseriae.

4b. Humanos vitat favores,
Fortiter perfert labores
Pro pace ecclesiae.

5 a. Post diadema spineum
Promissum sertum aureum
Possidet in saecula;

5 b. Nobis regnum sidereum
[Exoret] et apud Deum
Iuvet prece sedula.