268. De sancto Lamberto.

1 a. Lambertus martyr
in conspectu Domini
die ista
apparuit cum gloria.

1b. Congratulemur

in laude tua, Deus,
cum caterva
concinentes angelica.

2 a. Angelorum
sunt audita
primis diebus cantica

2 b. Testantium
voce clara
civis caelestis merita.

3 a. Ecce iam sponso
caelesti Christo
gaudens amicus astat.

3 b. Curavit casta
ut esset sponsa
illius ecclesia.

4 a. Inde est

quod per mortis plagam
scandit caelos sacerdos
et castitatis victima,

4 b. Occidit

illum adultera
arguentem in porta,
ut Iohannem Herodias.

5 a. Sic caeleste templum intrat
cum corona et cum palma
nitens stola purpurea.

5 b. Abierunt iam priora
exsilium, mundi rixa,
afflictio et mors ipsa.

6 a. Hic te confovet, Legia,
ut nidum suum aquila,

6b. Et sicut gallina congregat
pullos suos sub alas.

7 a. O Lamberte, Dei gemma,
ora pro sancta ecclesia,

7 b. Christum martyrii via

secutus in sanctorum sancta.

8 a. Offer nostra Deo vota

8 b. In memoria aeterna.

9. Trinitati summae
in saecula
sit gloria,
lausque sempiterna.