278. In Translatione S. Mammetis.

1. Christi virtus attollatur,

Per quem Mammes coronatur
Felici victoria.

2 a. Felix puer et insignis,

Dignus laude, dignus hymnis,
Dignus caeli gloria.

2 b. Dignus Deo martyr iste
Tua laus est, Iesu Christe,
Te sequens per omnia.

3 a. Nam, abiectis mundi curis,
Sacris studens in scripturis,
Contempsit praesentia ;
Soli Deo serviens
Montem scandit, fugiens
Humana consortia;

3 b. Ubi latens et ignotus,
Deo placens et devotus,
Legit evangelia;

Quae dum legit veniunt
Et devote serviunt
Legenti silvestria.

4 a. Nam de eis lac mulgetur,
Ut per sanctum relevetur
Pauperum inopia.

4b. Dum sic sanctus operatur,
Quod sit magus accusatur
In regis praesentia.

5 a. Ubi diu cruciatus
Et obscuri mancipatus
Carceris angustia,

5 b. Christum orat et precatur,
Quem precantem consolatur
Vox de caelo nuntia:

6 a. "Martyr",inquit, "neformides
Haec tormenta quae tu vides,
Sed sit firma tua fides
Virtutum constantia ;

6 b. Ecce Christus, leo fortis,
Vitae dator, victor mortis,
Ad supernae regna sortis
Te vocat in gloria;

7 a. Ubi nullas hostis metus,
Nullus dolor, nullus fletus,
Ubi sine nocte dies,
Ubi pax et vera quies
Et iugis laetitia.

7 b. In hac agnus pietatis
Nos solutos a peccatis
Det regnare, det gaudere,
Det cum sanctis possidere
Sempiterna gaudia.