281. De s. Maria Magdalena.

1 a. Fontem misericordiae
Absorbet vas miseriae,
Christum Magdalena,

1b. Ut detrahat iustitiae
Donetque venam veniae,
Quae stat sorde plena.

2 a. Flexa, tristis livet gena
Ob reatum sceleris
Et doloris laxat frena
Memor vitae veteris.

2 b. Recumbentem domo plena,
Christe Deus, pasceris,
Cum in ipsa Magdalena
Cor contritum ingeris.

3 a. D[iu] rigata lacrima
Labis fit expers anima
Dumque capillis tergitur,

3 b. Maria peccans plurima
Cunctorum sui minima,
Dum abluit, abluitur.

4 a. Martha deversorio
Frequens ministerio
Christo famulatur ;

4b. Soror sed empyrio
Regi fletu vario
Secus pedes datur.

5 a. Iuxta crucem stat Maria
Cum virgine matre pia
Plorans Christum Domini,

5b. Primo mane fert unguentum,
Vadit flens ad monumentum
Sociata virgini,

6 a. Ut haec dolens hilaretur
Et salvata iucundetur
Resurgentis gloria.

6 b. Ergo Christus exoretur,
Ut peccantibus donetur
Digna paenitentia.