284. De sancta Margareta.

1 a. Hac in die magnalia
Christi laudans ecclesia
Psallat laeta,

1b. Qua, post vitae dispendia,
Caeli scandit fastigia
Margareta.

2 a. Claris orta natalibus,
Ab annis puellaribus
Mundum sprevit et idola ;

2 b. In puellari corpore
Virili certat robore,
Caeli fiat ut accola.

3 a. Quis condignis

Extollat laudibus,

Quod fortia

Premat humilibus,

Admiranda

Summi regis potentia?

3 b. Virgo sponsa

Non curat iudicem,
Ridet minas,

Spernit carnificem,
Detestanda
Dum intentat supplicia.

4 a. Iudex certat
Ut subvertat

Blandis miscens aspera,

4b. Nunc precatur,
Nunc minatur,

Nunc infligit vulnera.

5 a. Ignes, ungues, verbera
Membra vexant tenera ;

5b. Ridet Christi famula
Tortores et vincula.

6 a. Dum cum ea

Palam congreditur,
Quis audivit talia?

6b. A virgine

Sathanas vincitur ;
O nova victoria:

7 a. Hostis victus deiicitur,
Et deiectus confunditur,
Et confusus involvitur
Aeterna miseria,

7 b. Gaudet virgo dum patitur,
Mortem vincit dum moritur,
Et triumphans extollitur
Ad mansura gaudia.

8 a. Tu formosa

Plus quam rosa,
Et candore
Et odore
Repanda vincis lilia,

8b. Iam dilecto
Praeelecto

Iuncta Dei

Faciei
Dulci gaudes praesentia.

9 a. Tu stellis fulgidior.
Tu luna splendidior,
Superas solis lumina,

9b. Condigna martyribus,
Propria virginibus

Agno decantans carmina.

10 a. Cuius nos dignos gratia
Tua reddant suffragia,
Virgo martyr egregia,

10 b. Ut in caelorum curia
Decantemus voce pia:
"Sit Deo laus et gloria."