287. De sancta Margareta.

1. Margaritae virginis
Triumphum certaminis
Recolit ecclesia,

2 a. Immo laudent singuli
Creatorem saeculi,
Cuius fuit gratia,

2b. Quod aetas tenerior
Et sexus infirmior
Bella vicit fortia.

3 a. Satagebat impius
Praefectus Olybrius
Arte multifaria

3b. Inclinare virginem
Ad suam libidinem
Vanaque nefaria.

4 a. Sed in fide nobilis
Virgo stat immobilis,
Deam verum astruens,
Deos falsos respuens.

4b, Nec favet blanditiis,
Nec cedit suppliciis
Terrentis per aspera
Vel spondentis prospera.

5 a. Tunc furore
Graviore
Excitatus
Et iratus

Iudex inquit talia,

5 b. Sub clausura
Perobscura
Coarctetur,
Et dometur

Eius contumacia.

6 a. Quod iubetur,
Mox impletur,
Uti caecum
Nocte specum
Lucis intrat filia.

6 b. Licet locis
Caliginosis
Includatur,
Non fraudatur
Verae lucis copia.

7 a. Iubet idem exhiberi
Margaretam hostis veri
Dum eius seductoria
Exsecratur consilia.

7 b. Virgis dure laceratur,

Sed et flammis concrematur,
Ensis ictu caelestia
Conscendit ad palatia.

8 a. O fidelis et decora

Christi sponsa, sponsum ora
Ut nostrorum
Vitiorum

Emundet contagia,

8 b. Ut a poenis eruamur,
Et quiete perfruamur
Sempiterna
In superna
Paradisi curia.

9. Amen dicant omnia.