290. De sancto Martino.

1 a. Supernae pacis gaudia
Repraesentet ecclesia,

1b. Dum festa colit annua
Laude Martini cernua.

2 a. In Martini sollemnio
Crescat plebis devotio,

2b. Psallatque cleri concio
Cum spiritali gaudio,

3 a. Mundum, carnem, daemonia
Vicit, vitae munditia,

3 b. Incursu tot pbantasmatum
Cineris fecit grabatum.

4 a. Martinus catechuminus
De quo protulit Dominus:

4b. "Hac me veste operuit,
Cum vestem nudo tribuit."

5 a. Confusum sortilegium
Dedit casum haereticis,

5 b. Pro paganis praecipuum
Signaculum pontificis.

6 a. Quam felix sanans osculum
Leprosum, per miraculum,

6 b. Et quam iocundus visitans,
Tres mortuos resuscitans.

7 a. Hic languores et languidos
Sanavit atque morbidos,

7 b. Daemones fugans horridos
Semper fallendi cupidos.

8 a. Ipsi cives angelici
Sanctissimo pontifici

8 b. Pro merito multiplici
Sunt et erunt domestici.

9 a. Mirantur sed deficiunt
Pictavenses cum dormiunt,

9b. Fruuntur nec fastidiunt
Qui Martinum custodiunt.

10 a. Iste pater dispositus

Caelum intrans emeritus,

10 b. Semota iam caligine

Christum videt in lumine.

11a. Martinus cuius hodie
Celebrantur sollemnia,

11b. Iam revelata facie
Deum videt in gloria.

12 a. Servus reginae virginum,
Caelorum consors agminum

12 b. Excuset apud Dominum
Nostrorum lapsus criminum.

13 a. Nos ad sanctorum gloriam
Per Martini suffragia,

13 b. Post praesentem miseriam
Christi perducat gratia.