292. De sancto Materno.

la. Sion gaudens flore verno,
Flore vernans in aeterno,
Laeta psallat hodie.

1b. Sertum vitae in Materno
Coetu confert in superno
Caelestis militiae.

2 a. Viris tribus caritatis
In amplexu copulatis
Fidenter in Galliam

2b. A beato destinatis
Petro, fide Trinitatis
Implent et Germaniam.

3 a. Instant dum officio
Tollitur de medio
Citius Maternus,

3 b. Romam cum Euchario
Reverso Valerio,

Planctus fit fraternus.

4 a. Redeuntes ad humatum
Corpus, Petri sibi datum
Superponunt baculum,

4 b. Et diebus vita functum
Quaterdenis, sibi iunctum
Vivum gaudent socium.

5 a. In salutem populorum
Fit profectus Treverorum
Ac Coloniensium

5 b. Clarae gentis et Tungrorum

Archipraesul, norma morum

Factus est et speculum.

6 a. Mira res, pro singulo
Quietis in tumulo
Die, sibi datur

6b. Annus in officio
Laboris ab otio

Postquam suscitatur.

7 a. Cursu tandem adimpleto,
Dies claudit fine laeto
Sed, cum sub certamine

7 b. Hinc et inde repetatur
Corpus, quibus conferatur
Probatur in flumine.

8 a. O res mira, contra cursum
Rheni corpus tendit sursum
Miliaris spatium,

8 b. Signo monstrat in aperto
Loco petat quod pro certo
Urbem Treverensium.

9 a. Tungros ergo quos corpore
Privas, precatus, munere
Pater fove,

9 b. Ut ceteris cum filiis
Ierusalem in liliis
Venient novae.

10 a. Eia, pater, in amplexu
Requiescens firmo nexu
Rachelis in patria,

10 b. Nos, solutos nexu Liae,
Tecum frui vero die,
Prece fac in gloria.