300. De sancta Oda.

1 a. Spiritalis turma plaude,
Odam lauda iugi laude,
Celebri melodia.

1b. Ancilla Christi fidelis
Oda praemisit in caelis
Opes et allodia.

2 a. Haec de mundi primoribus
Orta ditavit moribus
Nobile coniugium.

2b. Flagrans igne caritatis,
Viduata castitatis
Elegit fastigium.

3 a. Eius mentem non turbavit
Nec ad lapsum inclinavit
Rerum affluentia;

3 b. Quam demonstrabat macies
Et angelica facies
Tinctam abstinentia.

4 a. Conculcavit mundi florem,
Eius sprevit et livorem,
Quaerens caeli gaudia.

4 b. Odam Christus concupivit,

Illi namque deservivit

In aurata fimbria.

5 a. Amauium decoravit,
Ubi casta militavit
Christo totis viribus,

5 b. Illic Oda sepelitur
Atque claris insignitur
Signis et virtutibus.

6 a. Haec virago generosa,
Paradisi vernans rosa,
Fulget in caelestibus,

6 b. Et cum Christo gloriatur ;
Quae nos suis tueatur
Meritis et precibus.

7 a. Amen dicat iste chorus,
Ut cum Oda sit decorus
In caelesti patria,

7b. Chorus iste dicat: amen,
Ut cum Oda post examen
Decantet: alleluia.