305. De sancto Paulo.

1. Paule, doctor gentium,
Christi vas egregium,
Vas insigne gratia,

2 a. Tuum est praeconium,
Tui verbi spolium
Gentium ecclesia.

2 b. Tu per verbi gladium
Resecas praeputium,
Circumcidis vicia.

3 a. Raptus caelum tertium
Intras sanctuarium,
Stupent omnes ebrium
Cella de vinaria.

3 b. Mentis nec ingenium,
Linguae nec eloquium
Explicat mysterium
Quod mens capit ebria.

4 a. Illic hauris
De thesauris,
Illic vides
Quod non fides
Sufficit exprimere.

4 b. Opes Christi
Quas vidisti,
Non recondis,
Sed refundis
Mystico charactere.

5 a. Praedicator veritatis,
Aemulator caritatis,
Magnus praeco gratiae,

5 b. Contra legem lege pugnas,
Quaestionum solvis pugnas,
Cessant caeremoniae.

6 a. Tandem passo sub Nerone
Pugna firmat spem coronae,
Neque caret mysterio
Doctrinae consors passio.

6 b. Mucro saevit pro mucrone,
Dum pro verbi ratione
Decollaris cum gladio
Mors congruit officio.

7 a. Ense verbi dimicasti
Ense ferri triumphasti,
Ensem ense superasti,
Mortem patientia.

7 b. Testis fluit lactis unda
Quantum fuit vita munda,
Quampraedulcis, quam fecunda,
Verbi sapientia.

8. Pasce nos in gloria.