306. In Conversione s. Pauli.

1 a. Saulus, adhuc spirans minas,

Bella, caedes et ruinas

Intentat ecclesiae,

1b. Animatus ad furorem
Transit tortor in rectorem
Nutu providentiae.

2 a. Hunc Damasum venientem
Christi servos opprimentem
Lux divina reprimit ;

2 b. Visum perdit in splendore,
Visu tamen meliore
Visus damna redimit.

3 a. Vas olim contumeliae,
Vas confusionis,

3 b. Vas es effectus gratiae,
Vas electionis.

4 a. Manum experta vindicem
Feritas mitescit,

4 b. Rapax in ovem simplicem
Lupus mansuescit.

5 a. Quem baptizat Ananias,
Christus, vitae docens vias,
Sacro replet flamine;

5 b. Vitae datus novitati

Quidquid potest homo pati
Fert pro Christi nomine.

6 a. Famem, sitim, frigus, poenas,
Saxa, fustes quadragenas,
Carceres et vincula,

6 b. In aquarum tempestate
Et in fratrum falsitate
Sustinens pericula.

7 a. Phitonissae tollit quaestum,
Magum ferit, et incestum
Damnat in Corinthio.

7 b. Incenduntur libri vani,
Moriuntur, fiunt sani,
Tacti semicinthio.

8 a. In Patroclum vita redit,
Et Plautillae, quia credit,
Reservatur maphora.

8 b. Brevi prece placat ventos,
Novem salvat et trecentos
Tuta fert in littora.

9 a. Dignus caelo contemplari
Quae non licet ulli fari
Raptus est ad supera:

9b. Apprehensa cum sarmento,
Sine carnis detrimento
Manum mordet vipera.

10 a. Palmae certus et coronae
Caput offert sub Nerone
Gratam Christo victimam;

10 b. Adhuc lingua Christum sonat
Et in caelis iam coronat
Pauli Christus animam.

11a. Paule, Sauli recordare,
Ac in nobis contemplare
Qualis olim fueris,
Et succurre miseris.

11b. Vas salubre, vas electum,
Salvatoris in aspectum
Nos purgatos provehas
Sedes in aethereas.