307. In Conversione sancti Pauli.

1 a. Gaude, vas electionis,
Consors Petri Simonis,
Paule, doctor gentium,

1b. Qui cum hostis esses prius,
Sis secreti conscius
Apud caelum tertium.

2 a. Ex tunc docens vitae viam,
Per quam Dei gratiam
In nobis agnovimus,

2 b. Hinc doctrinis instans veris,
Plus laborans ceteris,
Licet sis novissimus.

3 a. Missus post occasum solis
Diligenter excolis

Et propagas saeculum,

3 b. Praemiaris aeque primis,
Quia bene redimis
Adventum serotinum.

4 a. Christi fide propagata,
Cuncta mundi climata
Purgas ab erroribus.

4 b. Casta cuius ex doctrina
Verbi Dei semina
Pullulant in gentibus.

5 a. Seminator verbi Dei,
Verae praeco fidei,
Praecellens apostole,

5 b. Ut post legem prophetia,
Sic post evangelia
Tuae sunt epistolae.

6 a. Ergo, Paule, verbi vitae
Praedicator inclite,
Supplicamus quatinus

6 b. Ipsum vitae verbum ores,
Ut nos tui memores
Salvet idem Dominus.