310. De sancto Petro.

1 a. Petrus, splendor firmamenti,

Sal et sapor condimenti

Nascentis ecclesiae,

1b. Princeps est apostolorum,
Claviger regni caelorum
Et caelestis curiae.

2 a. Pro sequela Christi mundum
Dereliquit, et se mundum
A mundo constituit.

2 b. Umbra sola morbos sanat,
Simon magus, quem profanat,
Eius prece corruit.

3 a. Ex fulgore veritatis
Et fervore caritatis
Prae cunctis ardentior,

3 b. Calcat mare, Malchum caedit,
Sathan vincit, quem comedit
Zelus praeminentior.

4 a. Petrus Christum ter negavit,
Trinam culpam Christus lavit
Et trina confessio.

4 b. Ardet in amorem crucis,
Et in cruce summae lucis
Illustratur radio.

5 a. Omnes ergo nos infirmi
In hac petra stemus firmi
Per crucis martyrium,

5 b. Ut in cruce triumphemus
Et per crucem confutemus
Errores gentilium.