312. In cathedra Petri

vel in quolibet eius festo.

1 a. O Petre dux ecclesiae,
Claviger caeli gloriae,
Regis aeterni gratia,

1b. O Christi pastor ovium,
Et firma spes peccantium,
Per te donetur venia.

2 a. Petre, piscator hominum
Et relaxator criminum,
Supplicum dele maculas,

2 b. Petre, tu pater omnium,
Et illustrator mentium,
Dans sanctas vitae regulas,

3 a. Viam precantum dirige,
Culpa prostratos erige,
Cunctorum dele crimina,

3 b. Tu fide nos vivifica,
Et carne nos mortifica,
Caelique pande lumina.

4 a. Accende lumen sensibus,
Nos replens sanctis moribus,
Carnis expelle vitia,

4b. Tu caritate praevia,
Donata culpis venia,

Nos transfer ad caelestia.