318. De m.

Petro et Paulo.

1 a. In sollemni memoria

Apostolorum principis

1b. Piae laudis harmonia

Laetis resonet canticis.

2 a. Veneremur simul pari
Dignum laude venerari
Apostolum gentium ;

2 b. Ut quos amor vita iunxit,
Nec mors ipsa post disiunxit,
Iungat et praeconium.

3 a. Horum laus est, quod destructa
Romanae potentiae idolatria,

3 b. Iam fundata et firmata

Ibidem orbem gubernat ecclesia.

4 a. Fide Petri fundamentum,
Pauli tenet firmamentum
Dogmate ecclesia:

4 b. Clavis huic potentiae,
Illi cessit scientiae
Iuncta ad officia.

5 a. Petro namque sub pastore
Gratulatur et rectore
Inter fluctus saeculi;

5 b. Pauli viget ex doctrina
Vitae sumpta medicina
Grex fidelis populi.

6 a. Iste verbo instruit,
Ille caelum aperit
Verbo vitae credulis.

6b. Et quod unus praedicat,
Alter verum comprobat
Crebris hoc miraculis.

7 a. Hic Iudaeos, ille gentes
Viam vitae nescientes
Ad salutem convocat,

7b. Ambo praesunt convocatis,
Ambo certant desolatis
Hostis ne praevaleat.

8 a. Contra summae potentiae
Consurgunt imperium,

8 b. Unus crucis, alter ensis
Perpessus supplicium.

9 a. Sicque una urbe mortem
Una die passi, sortem
Ad iustorum transmeant;

9 b. Qui malorum nos exsortes

Sua prece et consortes

Beatorum faciant.