320. De ss. Petro et Paulo.

1 a. Senatores summi regis,
Veteris et novae legis
Ambo peritissimi,

1b. Petrus, Paulus nominati
Hodie sunt exaltati
Dei secretissimi.

2 a. Sol et luna dum creantur,
Tunc isti praefigurantur
Magna luminaria;

2 b. Ab istis illuminantur
A quibus inhabitantur
Caeli, terrae, maria.

3 a. Carmen tantae brevitatis
Commendare nequit satis
Viros tanti meriti,

3 b. Quos potentes huius mundi
Sapientesque profundi
Loquentes sunt veriti.

4 a. Iste cruci alligatus,
Alter capite truncatus,
Sicque per martyrium

4 b. Est uterque consummatus
Et cum iubilo portatus
Ad Christi consortium.

5 a. O concives angelorum,
Principes apostolorum
Et futuri iudices,

5 b. Nos immunes tormentorum
Faciatis et sanctorum
Gloriae participes.