322. De s. Petro Caelestino.

la. Novum sidus occidentis
Sol produxit orientis,
Christus Dei filius,

1b. Sanctum Petrum confessorem,
Nunc Dei comprehensorem.
Supernorum socius

2 a. Hic sublimis eremita
Per deserti devia,
Mirus signis, mirus vita
Volat ad sublimia.

2 b. Pater currus et auriga
Caritatis facula
In caelis vectus quadriga
Caeli gustat fercula.

3 a. Hic Helyas ex fervore,
Helisaeus cum splendore
Coruscans miraculis;

3 b. Ut Iohannes in desertis
Ipsum sequens ex apertis
Sanctitatis titulis.

4 a. Testantur miracula
Multa facta clare,

4b. Caeli tabernacula
Hunc inhabitare.

5 a. Dolor, tumor fugiunt,
Aegri surgunt sani,

5 b. Hoc sciant qui nesciunt.
Iuvenes et cani.

6 a. O pater, qui es in caelis,
Ad te clamat plebs fidelis
Quod procures gratiam,

6 b. Ut in hora nostrae mortis
Consortes aeternae sortis
Curramus ad gloriam.

7 a. Quod in ea residentes,
Iesu Christo perfruentes,
Cantemus per saecula;

7b. Nos dicamus omnes: Amen,
Ut det nobis sanctum flamen
Peccatorum veniam.