323. De s. Petro Caelestino.

1 a. Sancti sollemnia
Petri Caelestini
Colat ecclesia
In laude domini
Magna laetitia.

1b. Hic in penuria

Vixit, altissimi
Sequens vestigia,
Et evangelii

Complens consilia.

2 a. Nam ab infantia

Disponit spernere
Cuncta terrestria
Et Deum colere
Cum desiderio.

2 b. Abhorrens vitia,

Mundum deserere
Studet, et gaudia
Caelorum cupere
Sine fastidio.

3 a. Multis ieiuniis

Atque laboribus
Necnon vigiliis

Corpus quam pluribus
Perfecte domuit.

3 b. Carnem ciliciis

Et pannis vilibus,
Non in deliciis
Et vanitatibus
Vestire voluit.

4 a. Cibo reficitur

Duroque modico
Sed crebro pascitur
Verbo sanctifico
Servans silentium.

4 b. Hostis confunditur
Nutu deifico
Dum hunc persequitur
Modo mirifico
Infestans nimium.

5 a. O quam humilitas
In illo micuit
Atque benignitas
Ei complacuit
Et patientia ;

5 b. Nec minus caritas
In ipso claruit,
Et cordis puritas,
Per quae promeruit
Regna caelestia.

6 a. Nunc implorantibus
Tua suffragia,
Fac tuis precibus
Mundi naufragia
Vitare penitus,

6 b. Et nobis omnibus
Donetur gloria
Cum.sanctis coetibus
In caeli patria

Post vitae transitus.