325. De sancto Potentino.

1 a. Corde voci concordante,
Militans cum triumphante
Iubilet ecclesia;

1b. Dies fulget triumphalis,
Dies nobis specialis,
Dies plena gratia.

2 a. In excelsum sublevare
Et excelsos contemplare,
Laeta mentis acies,

2 b. Videlicet per specular

Regem rubrum per torcular
Quot sequuntur acies.

3 a. Fortes inter agonistas
Victae carnis citharistas
Nostros vide proceres

3 b. Suo regi consignatos
Et signanter monetatos
Crucis per caracteres.

4 a. In potente Potentinus

Christi quondam peregrinus
Praeminet collegio,

4 b. Crucem non angariata
Gerens mente sed parata
Regis in vestibulo.

5 a. Iste [ortus] Francia,
Regis proles regia
Novus flos emicuit,

5 b. Quod et generositas

Morum et maturitas

In infante sapuit.

6 a. Nam astutus in serpente
In columba innocente
Simplex servat medium,

6 b. Et naturae fundamenta
Firmat, addens ornamenta
Per doctrinae studium.

7 a. In tenello fidei
Dogma capit nivei
Vasculo pudoris,

7 b. Nec cedit verberibus
Caesus a parentibus
Ducibus erroris.

8 a. Tandem diaconii
Vir sanctus officii
Onere levatur,

8 b. In morbis potentibus
Curandis et moribus
Sanctitas probatur.

9 a. Spirat bonus odor Christi
Nec lucernae fulgor tristi
Conditur sub modio.

9 b. Postulatur a Westphalis,
Ut sit pater spiritalis
Urbi Monasterio.

10 a. Vix assensum dans honori
Carpit iter, promptus mori
Cum duobus nuntiis,

10 b. Efferatus hoc rumore
Insectatur in furore
Patruus cum sociis.

11a. Mox legatis iussis mori
Paulum differt acriori
Levitam supplicio,

11b. Quem confossum prius telis
Purpuratum mittit caelis
Mucronis percussio.

12 a. Potens martyr Potentine,
Cum conservis nos divinae
Paci reconcilia,

12 b. Ut ad regis et reginae,
Regnaturi sine fine,
Inducamur gaudia.