326. De sancto Potentino.

1 a. Triumphantis in agone
Triumphalis spe coronae
Martyris praeconia

1b. Voto voce veneretur,
Grata laude gratuletur
Iubilans ecclesia.

2 a. Inter illos primitivos

Duces qui pro Christo rivos
Sacri fundunt sanguinis,

2 b. Potens martyr Potentinus
Christi quondam peregrinus
Clari fulget nominis.

3 a. Qui Francorum rege natus,
Regni sceptrum execratus
Regni cum divitiis,

3 b. Crucem Christi meliorem
Aestimavit, et maiorem
Aegypti deliciis.

4 a. Per mare rubrum baptismi
Transiens, Christianismi
Se subiecit legibus ;

4b. Admirandus in doctrina,
Et caelesti medicina,
Claruit virtutibus.

5 a. Cuius vitam decoravit
Et mortem glorificavit
Sanguinis effusio,

5 b. Quem confossum prius telis
Purpuratum mittit caelis
Mucronis percussio.

6 a. Potentine, miles bone,
Pastor, pater et patrone,
Nos Christo cum sociis

6 b. Commenda, quod emendati
Tuis, pater, tui nati
Coniungamur gaudiis.