327. De sancto Raphaele.

1 a. Missus est de summis caelis
Raphael, ut Tobielis
Tollat caecitatem;

1b. Post, ut medicus fidelis,
Sarae, natae Raguelis,
Det fecunditatem.

2 a. A patre puer mittitur,

Atque conductor quaeritur;
Ad fores reperitur
Succinctus Azarias.

2 b. Tobiae introducitur,
De viis Medi petitur,
Et statim conceditur,
Ad Rages novit vias.

3 a. Ad Tigris littus pedes lavit
Adulescens et expavit
Piscem inhiantem:

3 b. "En me invadit", exclamavit ;

Cui Raphael imperavit

Trahi palpitantem

4a. In siccum, quem exenteravit,
Cor, fel, iecur reservavit
Ut rem medicantem.

4 b. Azariam obsecravit,
Et confestim indicavit
Vim morbos sanantem.

5 a. Haec doctrina approbatur,
Verbis praxis operatur,
Cum spiritum fugavit.

5 b. [Tunc] a Sara septemvira
Iecoris virtute mira
Daemonem extricavit.

6 a. Celebratis nuptiis,
Solutis et argenteis
Talentis Ragueli,

6b. Redit cum divitiis
Tobias et substantiis ;
Laus sit Deo caeli,

7 a. Qui felle sanavit caecum
Et redonavit lumen.

7 b. Nobis conregnare secum

Det sempiternum numen.