332. De ss. Sergio et Baccho.

1. Laudes dicamus omnes
cum cantibus almis,

2 a. Et carmen praeclarum
resonemus
regem laudantes Dominum,

2 b. Qui caelum et terram
stabilivit
et qui formavit maria.

3 a. Nam ipse fecit

quaecunque moventur in his

3 b. Atque distinxit

formans species quasque
et per genera dividens.

4 a. Ipse qui creavit

pius elementa,

ipse volens

inter elementa venit,

4b. Ubi carnem nostram
atque carnis
plenum indumentum,
sacra natus
de virgine susceperat.

5 a. Passus est plurima

in carne latens Dominus.

5 b. Tentas est vinclis
atque alapis caesus
et verberibus nimiis.

6 a. Crucis et indignam
pro nobis pertulit
patienter poenam,

6b. Ut nos ab aeterna
potenter solveret
miseratus poena.

7 a. Electi

ac sancti Dei
martyres plurimi

hoc cognoscentes

ad veram fidem venerant.

7 b. Ex quibus

sanctos colimus
martyres Domini
fratres et ipsos
in fide pariles
qui pro divino
multas poenas amore
in corpore pertulerunt.

8 a. Nam Bacchus unus est,
et Sergius est alter
pro quibus dicimus
laudes tibi, Christe;

8 b. Quos tunc Antiochus
dux sub Maximiano
tormentis variis
ausus est punire.

9 a. Nam Baccho vitam

hanc praesentem tulerat
saeva per flagella,

9b. Ast fratrem eius
post absciso capite
fecerat transire

10. Portas caeli.