338. De sancto Terrenano.

1 a. Almi patris Terrenani
Attollamus, christiani,
Laudes et praeconia.

1 b. Ipsum pie deprecemur,
In hac die veneremur
Eiusque sollemnia.

2 a. Vas et lampas sanctitatis
Pacis semper claritatis
Dirigebat foedera.

2 b. Nostrae matris ardens zelo,
Lucis fulgens nunc in caelo
Decoravit opera.

3 a. Praesulatus hic honore
Dei plebis et amore
Fama crevit lucida.

3 b. Sidus tale sibi datum

Caelum gaudet fore natum,
Gaudet et Albania.

4 a. Carnem fraeno castitatis,
Vas ut esset puritatis,
Edomare studuit.

4b. Inter sanctos numerari
Et in luce collocari
Caelesti promeruit.

5 a. Hic egenos relevavit,
Cibis, potu satiavit,
Nudis vestem tribuit,

5 b. Prudens, pius, castus, mitis,
Palmes crescens verae vitis,
Virtus eius claruit.

6 a. Deprecamur hunc patronum
Ut, ascendens Dei thronum,
Prece sua, meritis,

6 b. Nos qui culpa sumus rei
Sorti mergat summae spei,
Salvet et ab inferis.

7 a. Iesu Christe, tristi nece
Nos Ternani pia prece
Salvos duc ad gaudia,

7 b. Ut, muniti sancta cruce,
Perfruamur tua luce
Per aeterna saecula.